Sí, desta vez vai... Comeza a reforma da ponte do Covelo
Agora sí. Portos de Galicia, a través da empresa Covsa, iniciou hoxe as obras de reforma da deteriorada ponte do Covelo, en Samieira. Os traballos dan resposta á lamentable situación da infraestrutura, que ten máis de 60 anos e escasas actuacións de acondicionamento.
Para veciños/as e ocasionais o seu aspecto exterior, nun dos principais reclamos turísticos da parroquia, reproducía unha imaxe penosa e perigosa. Por unha banda, na parte superior, unha gran fenda, parcheada en varias ocasións, cruzaba o pavimento de lado a lado. Por outra, na parte inferior, múltiples evidencias da corrosión eran facilmente apreciables a simple vista.
A situación preocupaba e indignaba a partes iguais. Polo lugar transitan todo tipo de vehículos, incluidos os municipais de recollida do lixo, e irremediablemente os dos veciños/as que teñen a ponte como única opción para acceder as súas vivendas.
As obras iniciadas hoxe, despois dunha considerable demora, aumentarán a seguridade para acceder ao peirao, tanto para peóns coma para tráfico rodado. A previsión é que duren aproximadamente dous meses e que o deseño final manteña os soportes centrais da estrutura.
Denuncias polo mal estado
A necesaria reforma da ponte do Covelo encheu reunións, prensa e até minutos de televisión. As cámaras da Televisión de Galicia recolleron en 2013 as denuncias dos veciños/as e viandantes da zona polo estado lamentable da infraestrutura.Veciños/as e viandantes denuncian o mal estado da ponte na Televisión de Galicia |
A obra, que está sendo sufragada co orzamento destinado aos proxectos de reforma das zonas portuarias de Covelo e Raxó, é unha actuación prioritaria para a veciñanza.
Quedan, porén, por concretar que partes do proxecto orixinario de remodelación da zona do Covelo se realizarán finalmente. O plan inicial, cuxa data de remate era antes do verán de 2013, abordaba unha actuación integral na que ademais da necesidade de ampliar a ponte, se contemplaban accións como a mellora dos servizos, o pavimentado da calzada que bordea a costa ou a instalación de colectores subterráneos. Tamén a controvertida idea, ao máis puro estilo romano-ourensán, das pozas de auga doce na desembocadura fluvial, zona sensible catalogada como ben de interese municipal.
Inicio dos traballos de reforma 01.02.2016 | Samieira Dixital |