Comezan as obras para rematar a senda peonil entre O Covelo e O Laño

Non é a obra do Escorial, pero case… Despois de varios anos de espera, o paseo litoral entre O Covelo e O Laño está hoxe máis preto do seu remate. Operarios da empresa Tragsa comezaron esta mañá os traballos para dar continuidade a este proxecto de senda peonil que comezou a fraguarse no remoto ano 2008 e que contou co financiamento do mediático Plan E.

Falta de acordo con varios propietarios/as

A obra, aprobada por Costas do Estado a cambio de que o Concello de Poio lograse a cesión dos terreos necesarios, non conseguiu no seu día o acordo de todos os veciños/as afectados/as. Por este motivo, ante a negativa de varios propietarios/as, en xaneiro de 2013, a administración municipal optou por un procedemento expropiatorio que afectaba a tres parcelas dun dos tramos sen rematar. O proceso supuxo a aprobación da utilidade pública dos terreos, taxados conxuntamente, e o desposuímento forzoso dunha franxa de dous metros de ancho que agora permite completar a senda.

Os propietarios/as demandaron varios compromisos que o Concello adquiriu, entre eles: reverter o terreo se nalgún momento perde a utilidade pública ou trata de rendibilizarse mediante algunha actividade privada; desautorizar a instalación de casetas ou arboreda de gran porte na fronte; ou manter a prohibición de paso de motocicletas, ciclomotores e turismos.

Máis información - Histórico de novas do proxecto:

11.11.2014, FARO DE VIGO: "O Concello expropia os últimos terreos para finalizar a senda do Laño"

08.07.2014, DIARIO OFICIAL DE GALICIA: "Anuncio do proxecto de expropiación da senda peonil do peirao do Covelo e praia do Laño, parroquia de Samieira (Expediente 106/2013)".

03.06.2014, FARO DE VIGO: "O Concello inicia a expropiación para completar o paseo do Laño"

08.11.2013, FARO DE VIGO: "A oposición de dous veciños bloquea dende hai dous anos o remate do paseo do Laño"

05.10.2013, FARO DE VIGO: "Luz verde á expropiación de leiras para continuar o paseo Covelo-O Laño"

25.10.2011, FARO DE VIGO: "Costas prepara o último tramo do paseo Covelo-O Laño para iniciar as obras en novembro"

24.02.2011, FARO DE VIGO: "O primeiro tramo do paseo entre Covelo e Laño será unha realidade este verán"

24.02.2011, LA VOZ DE GALICIA: "Poio contará cun paseo peonil dun quilómetro entre Covelo e Laño"

23.02.2011, MINISTERIO DE FACENDA E ADMINISTRACIÓNS PÚBLICAS: "O delegado do Goberno en Galicia destaca o investimento próximo aos 200.000 euros que permitirá dotar a Poio dun paseo de case un quilómetro de lonxitude entre Covelo e Laño"

15.12.2009, LA VOZ DE GALICIA: "Costas do Estado impulsa o proxecto para acometer un paseo entre Laño e Covelo"

20.02.2008, LA VOZ DE GALICIA: "A xefa de Costas visitou Poio para estudar o proxecto que unirá a praia do Laño co Covelo"