Vandalismo e pintadas no miradoiro de Samieira

O miradoiro de Samieira loce, dende hai varias semanas, as consecuencias do comportamento incívico de quen non sabe respetar o que é de todos/as. Unha ou varias persoas estragaron o seu panel informativo e mancharon con pintadas o recinto deste popular enclave.

¿A firma dun/ha namorado/a a base de aerosol?

As pedras do peche perimetral e os laterais do panel informativo do miradoiro de Samieira foron cubertas, nun aparente "acto de amor arrebatado", con pintadas de aerosol negra, nas que se poden ler frases como «esa puta sonrisa» ou «te quiero».

Ainda que se descoñece a autoría da obra e non está claro se é froito dun simple acto de vandalismo, o resultado do sucedido semella ter moito que ver cun cutre ritual de namoramento.

Estrago do panel de informacións

O panel informativo do miradoiro tamén foi obxecto da acción dos/as vándalos/as. O cristal deste soporte de indicacións foi golpeado até romper quedando inservible para a súa finalidade.

O miradoiro de Samieira: un punto de referencia para turistas

Se o vandalismo constitúe un problema en calquera lugar debido ao deterioro material e estético que ocasiona, no caso dunha zona que recibe un gran número de visitantes, o perxuízo resulta aínda maior. O miradoiro de Samieira é un dos principais atractivos turísticos do concello de Poio pola beleza e espectacularidade das súas panorámicas da ría de Pontevedra.

Un gasto de reparación que debería adicarse a outros fins

É de agardar que en breve se eliminen os danos e o miradoiro poida recuperar deste xeito a súa imaxe orixinal. Irremediablemente o gasto de reparación deste comportamento incívico (dunha ou varias persoas, é dicir, dunha minoría) terá que ser sufragado por todos/as os/as veciños/as de Poio cos minguados fondos municipais que sempre deberían destinarse a outros fins.