A Xunta de Galicia e o Concello de Poio recibían onte, a primeira hora da mañá, a alerta dos veciños/as de Samieira pola presenza dun niño de vespa asiática (vespa velutina) na  zona do Laño. A colmea, de grandes dimensións, está colgada na arboreda do río Freiría, a varios metros de altura sobre o chan, e foi avistada por un persoa que camiñaba pola zona.

Con este achado son xa dous os casos de niños desta especie localizados en Poio. O primeiro foi detectado en Combarro e estaba construído, a diferencia do de Samieira, a ras do chan.

Intervención sobre o niño

A colonia de Samieira será retirada en breve, segundo informaron desde as administracións. Trátase dunha actuación necesaria, polo seu carácter de especie invasora, que terá que realizarse a últimas horas do día, momento no que as vespas están menos activas e é máis seguro proceder a súa eliminación. Para a intervención, nada sinxela, o persoal escargado terá que salvar a elevada altura para a inxección do químico insecticida que acabará con grande parte dos exemplares.

Niño de vespa velutina localizado no Laño, Samieira | Samieira Dixital

Ameaza para o ecosistema

A vespa velutina é unha praga proveniente de Francia que se detectou por primeira vez en España en 2010. En 6 anos logrou estenderse por Galicia, Navarra, País Vasco, Cataluña, Asturias e Cantabria, causando estragos na poboación de abella autóctona, o seu principal alimento. A especie sobrevoa as colmeas autóctonas e elimina os seus exemplares cando chegan cargados de pole e son máis vulnerables.

As femias fecundadas da vespa velutina (futuras raíñas) dispérsanse desde finais do mes de agosto até outubro. Nos meses máis fríos, estes exemplares hibernan e na primavera cada unha delas funda o seu propio niño. De cada niño poden saír entre 100 e 300 futuras raíñas que se expanen conquistando territorios a un ritmo de 50 quilómetros ao ano. 

O problema é moi grave pois a poboación de abellas autóctonas está a minguar o que se traduce tanto na baixada da produción de mel como na disfunción da importante tarefa de polinización que realizan estes insectos e que afecta ao 80% de froitas e verduras.

Como actuar no caso de atopar un niño de vespa asiática

A primeira recomendación é manterse a unha distancia prudencial para evitar que os insectos se sintan ameazados. A segunda, chamar ao teléfono 012. É o que centraliza as chamadas cidadás sobre avistamentos de niños de vespa velutina. Preguntarán unha serie de datos, como a forma e a localización do niño. É o que permite aos técnicos/as facer unha primeira discriminación para dilucidar se se trata dun niño de vespa asiática, que é preciso retirar, ou unha colmea doutra especie ou abellas autóctonas.

Desde o programa autonómico de vixilancia e control da vespa velutina, recomendan á cidadanía colaborar na detección de individuos ou colmeas. O servizo está operativo os 365 días do ano.

Máis información:

Programa de Vixilancia e control da Vespa Velutina

Ler máis...

A Volta 2016 percorrerá Samieira este luns 22 de agosto. A 3ª etapa deste evento deportivo atravesará o pobo pola estrada PO-308 sobre as 13.33 horas en dirección Sanxenxo.

O itinerario desta etapa consta de 176 kilómetros, os que separan Marín do Miradoiro do Ézaro.

A primeira proba de media montaña

A 3ª etapa da Volta sairá de Marín ás 13.06 horas. Será a primeira proba de media montaña da rolda na que haberá dous portos importantes: o Alto de Lestaio e o Alto das Paxareiras, de terceira e cuarta categoría.

A organización prevé a chegada ao alto do lexendario Miradoiro do Ézaro entre as 17.28 e as 17.53, dependendo da velocidade.

En Samieira haberá unha oportunidade para contemplar este evento deportivo:

1. Na PO-308 (Avda. do Laño e Avda. do Covelo) ás 13:33 horas. O pelotón irá dirección Sanxenxo.

O espectáculo atravesará Poio a partir das 13.22 horas: A Barca 13.22 h, Combarro 13.29 h, Raxó 13.37 h.

Máis información:

Páxina web oficial da Volta Ciclista a España.
A Volta en RTVE.
Páxina oficial de facebook da Volta.
Historia da Volta: Percorridos por Pontevedra.

Ler máis...

O Concello de Poio solicitou autorización a Augas de Galicia para realizar obras de saneamento na Av. do Laño, en Samieira. A actuación conleva a instalación dun novo colector e a construción de varios pozos de rexistro entre os puntos quilométricos 8.860 e 9.970 da estrada PO-308.

O novo colector, de PVC, terá unha dimensión de 315 mm. de diámetro. As obras alcanzarán unha lonxitude de 1.134,14 m. e incluirán a construción de diversos pozos de rexistro para mantemento da rede, as reposicións do viario necesarias e o grampado do colector no canto do taboleiro das pontes do río Freiría e o rego do Laño. 

20 días de información pública e alegacións

De conformidade co art. 52 do Regulamento do Dominio Público Hidráulico, as persoas que o desexen poden examinar este proxecto. Mañá ábrese un prazo de vinte (20) días de información pública no que tamén aquelas persoas que se sintan prexudicadas por esta actuación poderán presentar as súas reclamacións. O expediente, codificado cos caracteres DH.W36.52159, estará exposto no Concello de Poio e nas oficinas da Entidade Pública Empresarial Augas de Galicia, situadas na R/ San Salvador, 2-4º de Vigo.

Praia do Laño, Samieira (Poio)

Ler máis...